o甘鬼耐無update絕對唔係我懶，係因為部機廢，真係不得不承認物似主人形，唉…太過有自知之明其實都唔係好事…

17日內做過好多野，唔知點解日日都要走出街。今日係唯一一日留o係屋企，但如果唔係手指公篤魚蛋同埋我聽日又要比賽，我今日都會去左打羽毛球。

至於做過d乜，咪又係補習，打tag，打羽毛球，游水，探婆婆，約朋友們吃飯，o係條街度係o甘行但係又無錢買野，o係度係o甘怨無得睇波但又死唔肯出街睇等等，不過總好過坐在家中沒事幹o既~

17日內睇左兩套戲，有唔駛錢o既<愛‧作戰>同埋<麥兜2菠籮油王子>。<愛‧作戰>真的不錯不錯，值得睇啊，不過若果唔係米高突然有免費飛，我都唔會o係夜晚9點特登去睇落畫前最後一埸。至於<麥兜2菠籮油王子>，簡直愛死佢啦~~

上個星期三米高入左醫院住左一晚檢查隻腳，遲d就要做手術o刺，到時我又要成日出入多一間醫院，唉，最憎醫院，去親醫院都無好野！

經過歐洲國家杯呢一役之後，我更加可以肯定我爸爸係好得！佢唔理家中有多人極力爭取安裝有線，佢仍然堅決誓不低頭，因為佢深信一樣野，呢一樣野就係……鴨寮街既科技最終都可以戰勝有線電視！